چیف الیکشن کمشنرکا تقرر ، شہباز شریف نے 3 نام وزیراعظم کو بھجوا دیے 76

چیف الیکشن کمشنرکا تقرر ، شہباز شریف نے 3 نام وزیراعظم کو بھجوا دیے

اسلام آباد : اپوزیشن لیڈر شہباز شریف نے چیف الیکشن کمشنرکےتقررکیلئے3نام وزیراعظم عمران خان کوبھجوادیے، جس میں ناصرمحمودکھوسہ،جلیل عباس جیلانی اور اخلاق احمد تارڑ کے نام شامل ہیں۔

تفصیلات کے مطابق مسلم لیگ ن کے صدر شہباز شریف نے وزیراعظم عمران خان کو خط لکھا ، جس میں شہبازشریف نے چیف الیکشن کمشنر کے تقرر کے لئے 3 نام بھجوادیئے ہیں، خط میں ناصر محمود کھوسہ، جلیل عباس جیلانی اور اخلاق احمدتارڑ کے نام تجویز کئے گئے ہیں۔

شہباز شریف نے خط میں کہا ہے کہ میری دانست میں یہ شخصیات اس منصب کے لئے نہایت مناسب،اہل ہیں ، بغیر کسی مزید تاخیر کے چیف الیکشن کمشنر کیلئے یہ 3 نام زیر غور لائیں ، امید کے ساتھ 3 نام بھجوا رہا ہوں کہ آپ کی طرف سے جلد جواب ملےگا۔

خط میں کہا گیا 6 دسمبر کو چیف الیکشن کمشنر کی 5سال کی آئینی مدت مکمل ہورہی ہے، الیکشن کمیشن کے 2ارکان کے منصب بھی تاحال خالی ہیں، الیکشن کمیشن کا بینچ کم ازکم 3ارکان پرمشتمل ہونا چاہئے، چیف الیکشن کمشنر اور زائد ارکان کا تقرر نہ ہوا تو الیکشن کمیشن غیرفعال ہوجائے گا۔

شہباز شریف نے کہا آرٹیکل 213 ٹو اے کا تقاضا ہے، وزیراعظم اپوزیشن لیڈر سے مشاورت کریں، آئین کے تحت آپ کو مشاورت کا عمل بہت عرصہ قبل شروع کرنا چاہیے تھا، امید ہے کہ ان افراد کی اہلیت کی آپ پذیرائی کریں گے۔

خط میں کہا گیا وزیراعظم قانون کے مطابق فوری یہ نام زیر غور لائیں اور مزید وضاحت یا معلومات درکار ہو تو آپ کو فراہم کردی جائے گی، الیکشن کمیشن ارکان کے تقرر کے لئے اتفاق رائے پر مبنی مشاورت ضروری ہے، مشاورت کے لئے عدالت عظمیٰ نے فیصلوں کے ذریعے رہنمائی مہیا کردی ہے،

شہبازشریف نے 2صفحات کے خط میں عدالت عظمیٰ کے نظائر کی تفصیل بھی درج کی ہے اور کہا ہے کہ بدقسمتی سے مشاورت میں کمیشن ارکان پر اتفاق رائے نہ ہونے سے تعطل پیدا ہوا، آپ پر زور دیتا ہوں اتفاق رائے کے لئے اس مرتبہ مخلصانہ اور سنجیدہ کوشش کریں۔

خط میں شہبازشریف نے وزیراعظم عمران خان پر معاملے میں فوری کارروائی کے لئے زور دیا ہے۔

خیال رہے چیف الیکشن کمشنرسردار رضا چھ دسمبر کو ریٹائرڈ ہوجائیں گے ، لیکشن کمشنر کی ریٹائرمنٹ کے بعد الیکشن کمیشن غیر فعال ہوجائے گا، سرداررضا نے 6 دسمبر2014 کو عہدہ سنبھالا تھا۔‏

اس خبر پر اپنی رائے کا اظہار کریں

اپنا تبصرہ بھیجیں