مفتی شامزئی اور مفتی جمیل کا مبینہ قاتل گرفتار 60

مفتی شامزئی اور مفتی جمیل کا مبینہ قاتل گرفتار

کراچی: شہر قائد کے علاقے موسمیات میں سی ٹی ڈی نے کارروائی کرتے ہوئے مفتی شامزئی اور مفتی جمیل کے مبینہ قاتل کو گرفتار کرلیا۔

تفصیلات کے مطابق کراچی کے علاقے موسمیات کے قریب سی ٹی ڈی سول لائن نے کارروائی کرتے ہوئے مبینہ دہشت گرد گرفتار کرلیا، حیدر زیدی عرف سلیم بھائی کا تعلق کالعدم تنظیم سے ہے۔

انچارج سی ٹی ڈی کا کہنا ہے کہ ملزم غیرملکی شہریوں سمیت مفتی اور علماء کو قتل کرچکا ہے، ملزم نے 2004 میں مفتی نظام الدین شامزئی کو قتل کیا۔ ملزم نے سال 2004 میں ہی مفتی جمیل کو بھی قتل کیا۔

سی ٹی ڈی حکام کے مطابق ملزم نے 1993 اور 1995 کے دوران مساجد اور جلوسوں پر حملے کیے، ملزم نے 2004 میں جامعہ بنوریہ کے باہر موٹرسائیکل بم دھماکا کیا۔

انچارج سی ٹی ڈی کا کہنا ہے کہ ملزم حیدر زیدی کا نام ریڈ بک میں شامل ہے، ملزم نے پارا چنار سے دہشت گردی کی تربیت حاصل کی تھی، ملزم لاہور میں مولانا ضیا الرحمان پر بم حملے میں ملوث رہا ہے۔

سی ٹی ڈی حکام کے مطابق ملزم حیدر زیدی عرف سلیم بھائی کے قبضے سے اسلحہ برآمد کرلیا گیا ہے جبکہ مزید تفتیش جاری ہے جس میں اہم انکشافات متوقع ہیں۔

اس خبر پر اپنی رائے کا اظہار کریں

اپنا تبصرہ بھیجیں