کراچی: پیٹرولیم مصنوعات کی قیمتوں میں حالیہ اضافے نے عوام پر مہنگائی کے پہاڑ گرا دیے ہیں، مختلف شہروں میں اشیائے خورونوش کی قیمتیں اور کرائے آسمان سے باتیں کرنے لگے ہیں۔
تفصیلات کے مطابق پیٹرولیم مصنوعات کی قیمتوں میں اضافے کے بعد مہنگائی آسمان پرپہنچ گئی ہے، لاہور میں ٹماٹر 100، پیاز100، آلو 100، کدو 100، ادرک 1200 روپے کلو، لہسن 500، گوبھی 200، شملہ مرچ 250 روپے، دال ماش 640، ثابت مسور 600، سفید چنے 400، چینی 180 روپے کلو فروخت ہو رہی ہے۔
ٹرانسپورٹرز نے کرایوں میں 15 سے 20 فی صد تک اضافہ کر دیا ہے، لاہور سے کراچی کا کرایہ 6600 سے بڑھا کر 7000 روپے کر دیا گیا، راولپنڈی کا کرایہ 2 ہزار سے 2200، پشاور کا 2500 سے 2750 ہو گیا، کوئٹہ کا کرایہ 4400 سے بڑھ کر 4650 روپے، مری کا کرایہ 2400 سے بڑھ کر 2650 روپے ہو گیا۔
مسافر دہائی دے رہے ہیں کہ پیٹرولیم مصنوعات کی قیمتوں اور کرایوں میں اضافے نے کمر توڑ کر رکھ دی ہے، جب کہ ٹرانسپورٹرز کا کہنا ہے کہ کرایوں میں اضافہ مجبوری ہے، گاڑیاں بند کرنی پڑ جائیں گی۔
ادھر کوئٹہ شہر اور نواح میں چینی 160 سے 170 روپے کلو میں فروخت ہو رہی ہے اور 20 کلو آٹے کا تھیلا 2800 سے 2850 تک فروخت ہو رہا ہے، ٹماٹر 80 سے 100 روپے کلو، بھنڈی 120 روپے کلو، کدو 70 روپے، بینگن 80 روپے کلو فروخت ہو رہا ہے۔
گائے کا گوشت 1000 سے 1100، بکرے کا 1700 سے 1800 روپے، مرغی کا گوشت 550 روپے کلو تک فروخت ہو رہا ہے، روجھان میں بھی اشیائے خورونوش کے نرخ عوام کی پہنچ سے دُور ہو گئے ہیں، گوبھی 200، بھنڈی 150، پیاز 80، ٹماٹر 160 روپے کلو، آٹا 135 روپے کلو، برائیلر مرغی کا گوشت 600 روپے کلو فروخت ہو رہا ہے۔
