امریکا میں رینو ایئر شو کے دوران فضا میں ریس لگاتے ہوئے 2 طیارے آپس میں ٹکرا گئے۔
ایونٹ کے منتظمین کے مطابق طیارے ریاست نیواڈا میں نیشنل چیمپئن شپ ایئر ریس اور ایئر شو کے دوران آپس میں ٹکرا گئے جس کے نتیجے میں دونوں طیاروں کے پائلٹ ہلاک ہو گئے۔
رینو ایئر ریسنگ ایسوسی ایشن نے فیس بک پر بیان میں لکھا کہ دوپہر 2:15 کے قریب T-6 گولڈ ریس کے اختتام پر دو طیاروں میں تصادم ہوا ہے اور اس بات کی تصدیق ہو گئی ہے کہ دونوں پائلٹ ہلاک ہو گئے ہیں۔
منتظمین نے دو پائلٹوں کی شناخت نک میسی اور کرس رشنگ کے طور پر کی ہے۔ حادثے میں کسی دوسرے کے زخمی ہونے کی اطلاع نہیں ہے۔ حادثے کے بعد منتظمین نے باقی ریس منسوخ کر دیں۔
نیشنل ٹرانسپورٹیشن سیفٹی بورڈ نے بیان میں کہا کہ وہ حادثے کی وجہ جاننے کی تحقیقات کر رہے ہیں۔ ایجنسی جو تحقیقات کی قیادت کر رہی ہے نے دو طیاروں کی شناخت شمالی امریکا کے T-6G اور شمالی امریکہ کے AT-6B کے طور پر کی ہے۔
این ٹی ایس بی نے کہا کہ تصادم کے بعد ہر طیارے کا ملبہ ایک دوسرے سے ڈیڑھ میل کے فاصلے پر گرا اور ملبے کو تجزیہ کے لیے آف سائٹ سہولت پر لے جایا گیا ہے۔
