امریکا میں خاتون مچھلی کھانے کے بعد ہاتھوں اور ٹانگوں سے محروم ہوگئیں۔
غیرملکی خبررساں ادارے کی رپورٹ کے مطابق امریکی ریاست کیلیفورنیا میں افسوسناک واقعہ پیش آیا جہاں 40 سالہ خاتون لورا بجارس اپنی ٹانگوں اور ہاتھوں سے اس وقت محروم ہوئیں جب انہوں نے مبینہ طور پر ٹھیک طرح سے نہ پکی ہوئی تلاپیا مچھلی کھالی۔
یہ مچھلی مہلک بیکٹریل انفیکشن سے آلودہ تھی۔
خاتون کی دوست اینا میسینا نے بتایا کہ گزشتہ ایک ماہ سے لورا بجارس مقامی اسپتال میں زیر علاج ہیں جن کی حال ہی میں سرجری کی گئی، لورا نے مچھلی مارکیٹ سے خریدی تھی اور گھر میں پکائی، اسے کھانے کے بعد ان کی حالت غیر ہوگئی اور وہ تقریباً بستر مرگ پر تھیں۔
انہوں نے بتایا کہ ڈاکٹرز نے لورا کی بگڑتی ہوئی حالت کے پیش نظر انہیں کوما میں بھیج دیا تھا کیونکہ اس کے دونوں ہاتھ، ٹانگیں، ہونٹ کالے ہوچکے تھے جبکہ گردے فیل ہورہے تھے۔
خاتون کی دوست کے مطابق متاثرہ خاتون وبریو ولنیکس نامی مہلک بیکٹیریل انفیکشن کی زد میں آگئی تھیں جو کچی سمندری غذا یا پانی میں پایا جاتا ہے۔
انہوں نے بتایا کہ اس سے محفوظ رہنے کے لیے ضروری ہے کہ سمندری غذا کو اچھی طرح صاف کرکے اور مکمل طور پر پکاکر کھایا جائے۔
متعدی امراض کی ڈاکٹر نتاشا سپوٹیس ووڈ کا کہنا ہے کہ آپ کوئی ایسی چیز جو آلودہ ہو اسے کھا کر بیکٹریا سے متاثر ہوسکتے ہیں، لہٰذا آلودہ چیزیں کھانے سے گریز کریں اور مچھلی یا دیگر سی فوڈز کو اچھی طرح صاف کرکے اور دھو کر پکائیں۔
