مندی کے سبب 64 فیصد حصص کی قیمتیں گرگئیں جبکہ سرمایہ کاروں کے 1کھرب 24ارب 70کروڑ 59لاکھ 67ہزار 729روپے ڈوب گئے۔
کراچی:آئی ایم ایف ایگزیکٹیو بورڈ کی جانب سے پاکستان کے لیے 1.1ارب ڈالر کی آخری قسط کے اجراء کی منظوری ملنے کی مثبت خبر کے باوجود پاکستان اسٹاک ایکس چینج میں منگل کو اتارچڑھاو کے بعد مندی کے زیراثر رہی۔
مندی کے سبب 64 فیصد حصص کی قیمتیں گرگئیں جبکہ سرمایہ کاروں کے 1کھرب 24ارب 70کروڑ 59لاکھ 67ہزار 729روپے ڈوب گئے۔
کاروبار کے ابتدائی دورانیئے میں اگرچہ 636پوائنٹس کی تیزی سے انڈیکس کی 72000پوائنٹس کی نفسیاتی سطح بحال ہوگئی تھی لیکن نئی مانیٹری پالیسی کے تحت شرح سود کم نہ ہونے اور گیارہ ماہ سے 22فیصد کی بلند سطح پر سود کی شرح برقرار رہنے کے ساتھ وزیراعظم کے دورہ سعودی عرب میں کوئی سرمایہ کاری معاہدہ نہ ہونے جیسے عوامل سے مارکیٹ میں پرافٹ ٹیکنگ اور مندی رونما ہوئی جس سے ایک موقع پر 636 پوائنٹس کی مندی بھی ہوئی تاہم اختتامی لمحات میں نچلی قیمتوں پر دوبارہ خریداری سرگرمیاں بڑھنے سے مندی کی شدت میں کمی واقع ہوئی نتیجتا کاروبار کے اختتام پر کے ایس ای 100 انڈیکس 592.49 پوائنٹس کی کمی سے 71102.55 پوائنٹس کی سطح پر بند ہوا۔
کے ایس ای 30 انڈیکس 147.35 پوائنٹس کی کمی سے 23394.66 پوائنٹس، کے ایم آئی 30 انڈیکس 817.83پوائنٹس کی کمی سے 119444.80پوائنٹس اور کے ایم آئی آل شئیر انڈیکس بھی 273.13پوائنٹس کی کمی سے 33272.39پوائنٹس پر بند ہوا۔
کاروباری حجم پیر کی نسبت 9فیصد کم رہا اور مجموعی طور پر 56کروڑ 5لاکھ 52ہزار 783 حصص کے سودے ہوئے جبکہ کاروباری سرگرمیوں کا دائرہ کار 384 کمپنیوں کے حصص تک محدود رہا جن میں 113 کے بھاو میں اضافہ 244 کے داموں میں کمی اور 27 کی قیمتوں میں استحکام رہا۔
جن کمپنیوں کے حصص کی قیمتوں میں نمایاں اضافہ ہوا ان میں یونی لیور پاکستان فوڈز کے بھاو 446.29 روپے بڑھکر 20000روپے اور العباس شوگر ملز کے بھاو 43.53 روپے بڑھکر 625.40روپے ہوگئے جبکہ ہال مارک کمپنی لمیٹڈ کے بھاو 90.02روپے گھٹ کر 1149.12روپے اور سفائر فائبرز لمیٹڈ کے بھاو 69.12روپے گھٹ کر 1423.33 روپے ہوگئے۔
