آئی ایم ایف بورڈ کی منظوری سے پاکستان کو 1.1 ارب ڈالر کی قسط ملے گی—فائل: فوٹو
اسلام آباد:عالمی مالیاتی ادارہ (آئی ایم ایف) کے ایگزیکٹیو بورڈ کا 29 اپریل تک اجلاس کا شیڈول جاری کردیا گیا ہے، جس میں پاکستان کا اقتصادی جائزہ شامل نہیں کیا گیا ہے۔
آئی ایم ایف ایگزیکٹیو بورڈ اجلاس کے ایجنڈے میں فی الحال پاکستان کا اقتصادی جائزہ شامل نہیں کیا گیا ہے جبکہ پاکستان اور آئی ایم ایف کے درمیان اسٹاف لیول معاہدہ 20 مارچ 2024 کو طے پایا تھا۔
آئی ایم ایف ایگزیکٹو بورڈ کی منظوری سے پاکستان کو 1.1 ارب ڈالر کی آخری قسط ملے گی اور آخری قسط کی حتمی منظوری کے ساتھ ہی 3 ارب ڈالر کا اسٹینڈ بائی ارینجمنٹ ختم ہو جائے گا۔
قبل ازیں پاکستان کے معاملے پر آئی ایم ایف ایگزیکٹیو بورڈ کا اجلاس اپریل کے آخر میں بلانے کا عندیہ دیا گیا تھا اور وفاقی وزارت خزانہ نے کہا تھا کہ پاکستان نے آخری قسط کے لیے تمام اہداف پورے کرلیے گئے ہیں اور اسٹاف لیول معاہدے کے ساتھ جائزہ مشن آخری قسط جاری کرنے کی سفارش کرے گا۔
یہ بھی پڑھیں: آئی ایم ایف سے آخری قسط کیلیے تمام اہداف پورے کرلیے، وزارت خزانہ
دوسری جانب وزیرخزانہ محمد اورنگزیب نے 16 اپریل کو واشنگٹن میں غیرملکی خبرایجنسی کو انٹرویو میں بتایا تھا کہ آئی ایم ایف کے ساتھ اقتصادی اصلاحاتی پروگرام کے لیے اربوں ڈالر قرض کے نئے معاہدے پر بات چیت شروع ہوگئی ہے۔
محمد اورنگزیب کا کہنا تھا کہ آئی ایم ایف کے ساتھ جاری پروگرام کے معاہدے کے تحت 1.1 ارب ڈالر کی آخری قسط رواں ماہ کے آخر تک منظور ہونے کا امکان ہے اور اس کے ساتھ ہی پاکستان نے کئی ارب ڈالر قرض کے نئے طویل مدتی پروگرام کے لیے بھی بات چیت شروع کردی ہے۔
