ملزمان سے ہنڈی حوالہ اور غیر ملکی کرنسی سے متعلق ریکارڈ بھی برآمد کر لیا گیا
ایف آئی اے کمرشل بینکنگ سرکل پشاور نے کارروائی کرتے ہوئے حوالہ ہنڈی میں ملوث منظم گینگ کے 2 ملزمان کو گرفتار کرکے سونے کی 9 اینٹیں برآمد کرلیں۔
ترجمان ایف آئی اے کے مطابق برآمد ہونے والے سونے کی مجموعی مالیت 2 کروڑ سے زائد ہے جنہیں بیرون ملک بھجوانے کا منصوبہ تھا۔ گرفتار ملزمان میں شاہد اور حبیب اللہ شامل ہیں جن سے لاکھوں مالیت کی کرنسی بھی برآمد ہوئی۔
ملزمان کو صرافہ بازار پشاور سے گرفتار کیا گیا جن سے مجموعی طور پر 65 لاکھ 20 ہزار پاکستانی روپے برآمد ہوئے۔
ملزمان برآمد ہونے والی کرنسی کے حوالے سے حکام کو مطمئن نہ کر سکے۔ ان سے ہنڈی حوالہ اور غیر ملکی کرنسی سے متعلق ریکارڈ بھی برآمد کر لیا گیا۔
ترجمان ایف آئی اے کے مطابق ملزمان کے خلاف مقدمہ درج کر لیا گیا اور دیگر ملزمان کی گرفتاری کے لئے چھاپے مارے جا رہے ہیں۔
