راولپنڈی:
جیولری شاپ میں ہوشیاری کا مظاہرہ کرتے ہوئے خاتون کی چوری کرنے کی وڈیو سامنے آ گئی۔
تھانہ بنی کی حدود میں جیولری شاپ پر دکاندار کی آنکھوں میں دھول جھونک کر لاکھوں روپے مالیت کی سونے کی چین چوری کرنے والی خاتون کو سی سی ٹی وی کیمروں نے بے نقاب کردیا۔ پولیس نے ملزمہ کو گرفتار کرکے بیش قیمت چین برآمد کرلی۔
گاہگ کے روپ میں آنے والی خاتون چور جیولری شاپ پر جیولر کی آنکھوں میں دھول جھونک کر ہاتھ کی صفائی دکھاتے ہوئے لاکھوں روپے مالیت کی سونے کی چین چرا کر لے گئی تاہم جیولری شاپ میں نصب سی سی ٹی کیمروں کی ریکارڈنگ نے اس کے ہاتھ کی صفائی کو محفوظ کرکے بے نقاب کردیا۔
فوٹیج میں دیکھا جا سکتا ہے کہ ملزمہ صدف جیولری شاپ پر جیولری دیکھنے کے بہانے بکس سے اچانک طلائی چین چرا کر اپنی گود میں ڈال لیتی ہے اور دکاندار کے متوجہ ہونے پر بکس میں دیگر چیزوں کو ترتیب سے رکھنا شروع کردیتی ہے۔
وپلیس شکایت سامنے آنے پر ٹیکنالوجی اور ہیومن انٹیلی جنس کی مدد سے خاتون ملزمہ کو ٹریس کرکے گرفتار کر لیا جبکہ چرائی گئی سونے کی چین جس کی مالیت ساڑھے 5 لاکھ روپے سے زائد تھی برآمد کرلی گئی۔
