کراچی:سندھ میں آوارہ کتوں کے کاٹنے کی شکایات کیلئے ہیلپ لائن 1093 بحال کردی گئی۔
سندھ ہائیکورٹ میں آوارہ کتوں کیخلاف کارروائی اور ویکسین کی عدم فراہمی سے متعلق درخواست کی سماعت ہوئی جس میں پروجیکٹ ڈائریکٹر اینٹی ربیز کنٹرول پروگرام نے جواب عدالت میں جمع کرادیا۔
جواب میں کہا گیا کہ کتوں کے کاٹنے کے واقعات کہ شکایت کے لیے بنائی گئی ہیلپ لائن 1093 بحال کردی ہے۔ جنوری 2022 سے مارچ 2024 تک 19 ہزار سے زائد کتوں کو ویکسین لگائی گئی ہے۔
رپورٹ کے مطابق 4 اضلاع میں ربیز کنٹرول سینیٹرز بنائے گئے ہیں۔ آوارہ کتوں کی بڑھتی ہوئی آبادی کو کنٹرول کرنے کے قوانین بنا دئیے گئے ہیں۔ صوبے کے ہر ضلع میں ڈاگس پاپولیشن کنٹرول سینٹر بنائے جائیں گے۔
29 فروری کو ہر ضلع میں ڈاگس پاپولیشن کنٹرول سینٹر بنانے کا نوٹیفکیشن بھی جاری کردیا گیا ہے۔ آوارہ کتوں کی شکایت اور کاٹنے کے واقعات سے متعلق شکایت کے لیے موبائل ایپ بھی بنا لی ہے۔
رمضان کے بعد عوام الناس کیلئے یہ ایپ فعال کردی جائے گی۔ شہری آوارہ کتوں سے متعلق تصویر اور پتے کے ساتھ شکایت کر سکتے ہیں۔ آوارہ کتوں کو ویکسینیشن کا سلسلہ جاری ہے۔ عدالت نے سماعت 4 مئی تک ملتوی کردی۔
