فلم ’مائے نیم از خان‘ کے اداکارسنگین حادثے کا شکار، آئی سی یو میں علاج جاری

بالی وڈ فلم ’مائی نیم از خان‘ میں اداکاری کرنے والے پروین دباس ایک سنگین کار حادثے کا شکار ہونے کے بعد ممبئی کے ایک اسپتال میں زیر علاج ہیں۔

رپورٹس کے مطابق وہ ایک ٹریفک حادثے کا شکار ہوئے جس کے بعد انہیں فوری طبی امداد فراہم کی گئی۔

انڈین ایکسپریس کے مطابق، ایک قریبی ذرائع نے بتایا کہ ڈاکٹروں نے تمام ضروری ٹیسٹ مکمل کر لیے ہیں اور ان کی اہلیہ، اداکارہ پریتی جھنگیانی، اسپتال میں ان کے ساتھ ہیں۔

پروین دباس نے فلمی دنیا میں اپنی پہچان بنائی، خاص طور پر ان کی کامیاب کامیڈی فلم ’خوسلا کا گھوسلا‘ میں شاندار پرفارمنس نے انہیں نمایاں کیا۔ ؎

ان کا کام مختلف طرح کی فلموں پر مبنی ہے، جن میں ’مائی نیم از خان‘ اور ’راگنی ایم ایم ایس 2‘ جیسی فلموں میں نمایاں کردار شامل ہیں۔ وہ ویب سیریز ’میڈ ان ہیون‘ میں بھی نظر آئے تھے۔

اداکار پروین دباس کی شادی اداکارہ پریتی جھنگیانی سے ہوئی ہے اور دونوں کے دو بچے ہیں۔