جنوبی کوریا میں شدید گرمی کی لہر نے گزشتہ تمام ریکارڈ توڑ دیے ہیں، جہاں ملک کی تاریخ میں پہلی بار درجہ حرارت 42.5 ڈگری سینٹی گریڈ تک پہنچ گیا۔ موسمیاتی حکام کے مطابق یہ گزشتہ ایک صدی سے زائد عرصے میں ریکارڈ کیا جانے والا سب سے زیادہ درجہ حرارت ہے۔
سرکاری محکمہ موسمیات کے مطابق یہ غیر معمولی درجہ حرارت جنوبی کوریا کے جنوب مشرقی شہر یانگ سان میں ریکارڈ کیا گیا، جو ان دنوں ملک میں جاری شدید گرمی کی لہر کا مرکز بنا ہوا ہے۔ حکام کا کہنا ہے کہ شہر میں مسلسل پانچویں روز درجہ حرارت 40 ڈگری سینٹی گریڈ سے تجاوز کر گیا، جس نے شہریوں کی مشکلات میں مزید اضافہ کر دیا ہے۔
شدید گرمی کے باعث جنوبی کوریا کے بیشتر علاقوں میں ہیٹ ویو وارننگ جاری کر دی گئی ہے۔ کئی شہروں میں درجہ حرارت 38 سے 40 ڈگری سینٹی گریڈ کے درمیان ریکارڈ کیا جا رہا ہے، جبکہ مقامی انتظامیہ نے عوام کو غیر ضروری طور پر گھروں سے باہر نہ نکلنے کی ہدایت کی ہے۔
حکام نے بتایا کہ ملک کے 20 سے زائد علاقوں میں ہنگامی گرمی الرٹ نافذ ہے۔ یہ نیا الرٹ سسٹم رواں سال متعارف کرایا گیا تاکہ غیر معمولی گرمی کی صورتحال میں بروقت حفاظتی اقدامات کیے جا سکیں۔ اس کے تحت اگر کسی علاقے میں محسوس ہونے والا درجہ حرارت 38 ڈگری یا حقیقی درجہ حرارت 39 ڈگری سینٹی گریڈ تک پہنچنے کا امکان ہو تو فوری انتباہ جاری کیا جاتا ہے۔
محکمہ موسمیات کے اعداد و شمار کے مطابق گزشتہ چند برسوں میں جنوبی کوریا میں شدید گرمی کے دنوں کی تعداد میں نمایاں اضافہ ہوا ہے۔ اب ملک میں سالانہ اوسطاً تقریباً 19 دن شدید گرمی ریکارڈ کی جاتی ہے، جبکہ 1970 کی دہائی میں یہ تعداد صرف 8 دن کے قریب تھی۔
ماہرین کا کہنا ہے کہ موسم کی شدت میں یہ اضافہ عالمی موسمیاتی تبدیلیوں کا نتیجہ ہے۔ ان کے مطابق انسانی سرگرمیوں سے پیدا ہونے والی ماحولیاتی تبدیلیاں دنیا بھر میں ہیٹ ویوز، شدید بارشوں اور دیگر موسمیاتی آفات کی شدت اور تعداد میں مسلسل اضافہ کر رہی ہیں۔
طبی ماہرین نے شہریوں کو مشورہ دیا ہے کہ شدید گرمی کے دوران پانی کا زیادہ استعمال کریں، دھوپ میں غیر ضروری وقت گزارنے سے گریز کریں اور بزرگوں، بچوں اور بیمار افراد کا خصوصی خیال رکھیں، کیونکہ یہ طبقے ہیٹ اسٹروک اور گرمی سے متعلق بیماریوں کا زیادہ شکار ہو سکتے ہیں۔
