اسلام آباد:جمعیت علماء اسلام کے مرکزی رہنما مولانا عبدالغفور غیدری نے کہا ہے کہ پیپلز پارٹی نے آج کراچی میں 12 مئی کی یاد تازہ کردی۔
مولانا عبدالغفور حیدری نے اپنے بیان میں کہا کہ جے یو آئی کے پرامن کارکنوں پر پولیس لاٹھی چارج اور شیلنگ سے پیپلز پارٹی کی اصلیت سامنے آگئی ہے۔
انہوں نے کہا کہ پیپلز پارٹی سندھ حکومت کو یرغمال بناکر جے یو آئی کے نہتے کارکنوں کو غنڈہ گردی کے زریعے روکنا چاہتی ہے۔ جمعیت علماء اسلام اپنے کارکنوں پر شیلنگ اور لاٹھی چارج کی شدید مذمت کرتی ہے۔
واضح رہے کہ عام انتخابات کے نتائج میں دھاندلی کے خلاف گرینڈ ڈیموکریٹک الائنس، جماعت اسلامی، جمعیت علما اسلام، تحریک انصاف و دیگر جماعتوں نے ہفتہ کو سندھ اسمبلی کے افتتاحی اجلاس کے موقع پر ایوان کے گھیراؤ کا اعلان کیا تھا۔
پولیس نے پریس کلب جانے والی جے یو آئی کی ریلی کو شارع فیصل پر کارساز کے قریب روکا تو کارکنان نے وہیں پر دھرنا دے دیا جس پر پولیس نے شیلنگ اور لاٹھی چارج کا استعمال کیا۔
ہنگامہ آرائی سے مرکزی سڑکوں اور راستوں پر شدید ٹریفک جام ہوگیا اور دور دور تک گاڑیوں کی قطاریں لگ گئیں۔
