ممبئی: گاندھی جینتی کے موقع پر اپلاز انٹرٹینمنٹ نے اپنی آنے والی سیریز ’گاندھی‘ کے حوالے سے ایک بڑا اعلان کیا ہے۔
معروف موسیقار اور گریمی ایوارڈ یافتہ اے آر رحمان اس سیریز کا میوزک کمپوز کریں گے، یہ سیریز رام چندرا گوہا کی تحریروں پر مبنی ہے اور اسے ہنسل مہتا کی ہدایت کاری میں بنایا جا رہا ہے۔
اپلاز انٹرٹینمنٹ کے منیجنگ ڈائریکٹر سمیر نائر نے کہا کہ ’گاندھی‘ صرف ایک سیریز نہیں، بلکہ یہ انسانی روح کی جیت کی عالمی داستان ہے۔ اے آر رحمان کی موسیقی اس کہانی میں روح پھونکے گی اور اسے عالمی سطح پر پہنچائے گی۔
اے آر رحمان نے بھی اپنی خوشی کا اظہار کرتے ہوئے کہا، ’گاندھی جی کی نوجوانی دیکھنا میرے لیے ایک انکشاف ہے۔ ان کی زندگی میں سچائی اور دیگر تجربات نے ان کے کردار کی تعمیر کی۔ اس کہانی کا حصہ بننا میرے لیے اعزاز کی بات ہے۔‘
ہدایتکار ہنسل مہتا نے کہا کہ ’گاندھی ایک انسانی داستان ہے جو نسلوں کو متاثر کرتی ہے۔ اے آر رحمان کی شمولیت ہمارے لیے ایک خواب کی تعبیر ہے۔ ان کی موسیقی اس کہانی کی جذباتی اور روحانی پہلوؤں کو ابھارے گی۔‘
