ماورا حسین کو کرسمس کی مبارکباد دینا مہنگا پڑگیا : فوٹو : انسٹاگرام
پاکستان شوبز انڈسٹری کی معروف ماورا حسین کرسمس کی مبارکباد دینے اور کرسمس کے لیے گھر میں درخت سجانے پر سوشل میڈیا صارفین کی تنقید کی زد میں آگئیں۔
آج پاکستان سمیت دنیا بھر میں عیسائی برادری اپنی عید منارہی ہے، ایسے میں معروف اداکارہ ماورا حسین نے اپنے انسٹاگرام ہینڈل پر اپنی ویڈیو پوسٹ کی جس میں وہ اپنے گھر میں کرسمس کے لیے درخت سجا رہی ہیں۔
یہ ویڈیو پوسٹ کرتے ہوئے ماورا حسین نے دنیا بھر کی عیسائی برادری کرسمس کی مبارکباد دیتے ہوئے اُن کے لیے نیک خواہشات کا اظہار کیا۔
ماورا حسین کی ویڈیو پوسٹ ہوتے ہی صارفین نے کمنٹ باکس میں اداکارہ پر تنقید کے پہاڑ توڑ دیے اور اُنہیں اسلامی تعلیمات کا غور سے مطالعہ کرنے کا مشورہ دینے لگے۔
ایک صارف نے کہا کہ “آپ نے عمرہ بھی ادا کیا ہے، فلسطین تباہی، ظلم و ستم کا شکار ہے اور آپ یہاں انہیں کرسمس کی مبارکباد دے رہی ہیں، یہ ٹھیک نہیں ہے کچھ تو خیال کریں، اللہ ہم سب کو ہدایت عطا فرمائے”۔
نور العین نامی صارف نے کہا کہ “بحیثیت مسلمان، آپ 2 عیدوں کے علاوہ کوئی تیسرا تہوار نہیں منا سکتیں”۔
ایک اور صارف نے کہا کہ “اسلام کا صحیح طریقے سے مطالعہ کریں، آپ کو علم کی ضرورت ہے تاکہ آپ اسلام کی قائم کردہ حدود کو توڑ نہ سکیں”۔
ایک صارف نے کہا کہ “غزہ میں لوگ مر رہے ہیں اور آپ عیسائیوں کا درخت لگا رہی ہیں، کہاں گیا اسلام اور انسانیت؟ مجھے لگا تھا کہ آپ ایک سمجھدار اداکارہ ہیں اور آپ اس سب کا بائیکاٹ کریں گی”۔
ایک صارف نے کہا کہ “ماورا آپ بھی مسلمان ہیں، ایک دن آپ نے بھی اس دنیا سے چلے جانا ہے اور یہ شہرت یہاں ہی رہ جائے گی”۔
