کراچی:
شاہراہ فیصل نرسری کے قریب موٹر سائیکل سوار مسلح ملزمان نے گاڑی پرفائرنگ کرکے شہری کو زخمی کردیا۔
پولیس کے مطابق اتوارکی صبح ٹیپوسلطان تھانے کے علاقے شاہراہ فیصل نرسری کے قریب شیل پیٹرول پمپ والی گلی میں 2 موٹرسائیکلوں پرسوارنامعلوم مسلح ملزمان نے گاڑی پرفائرنگ کردی اورفرارہوگئے، فائرنگ کے نتیجے میں گاڑی میں سوارشخص زخمی ہوگیا جسے پہلے نجی اسپتال اوربعدازاں جناح اسپتال منتقل کیا گیا جہاں زخمی شہری کی شناخت 40 سالہ محمد فراز خان ولد محمد خان کے نام سے کی گئی۔
زخمی شہری پی ای سی ایچ ایس سوسائٹی بلاک 6 کا رہائشی اور ہوٹل کا کاروبار کرتا ہے، ایس ایس ایچ اوٹیپو سلطان انسپکٹر طارق محممود نے ایکسپریس کو بتایا کہ فائرنگ کا واقعہ لین دین کے تنازع پرپیش آیا، زخمی شہری کوکسی سے 8 سے 9 کروڑ روپے لینے ہیں اور زخمی شہری رقم کی واپسی کا تقاضہ کررہا تھا، زخمی شہری کو موبائل فون پر دھکمی آمیز پیغامات بھی موصول ہوئے ہیں۔
ایس ایچ اونے بتایا کہ فائرنگ دو موٹر سائیکلوں پر سوار چار نامعلوم مسلح ملزمان کی جانب سے کی گئی، زخمی شہری کو ایک گولی گال پر لگی، پولیس نے جائے وقوعہ سے 30 بور پستول کے تین خول برآمد کرلئے، اطراف میں موجود سی سی ٹی وی فوٹیجز بھی حاصل کی جا رہی ہیں، پولیس نے زخمی شہری کا بیان بھی قملبند کرلیا ہے، زخمی شہری مقدمے میں 3 ملزمان کو نامزد کرانا چاہتا ہے۔
