مشہور جنوبی بھارتی فلم ’آر آر آر‘ کے اسٹار رام چرن اور پون کلیان کی نئی فلم ’گیم چینجر‘ کے پری ریلیز ایونٹ میں شریک ہونے والے دو مداح ایک حادثے میں ہلاک ہوگئے۔
بھارتی میڈیا کے مطابق یہ حادثہ آندھرا پردیش کے شہر راجمندری میں منعقدہ ایونٹ کے بعد پیش آیا، جہاں مداح اراوا منیکانتا اور تھوکڑا چرن واپسی پر موٹر سائیکل پر سفر کر رہے تھے۔ اس دوران مخالف سمت سے آنے والی وین سے ٹکرا کر دونوں شدید زخمی ہوئے۔
انہیں فوری طور پر اسپتال منتقل کیا گیا، مگر دونوں مداح زخموں کی تاب نہ لاتے ہوئے دم توڑ گئے۔ پولیس نے واقعے کا مقدمہ درج کر لیا ہے۔
بھارتی میڈیا کا کہنا ہے کہ فلم کے پروڈیوسر دل راجو نے حادثے پر افسوس کا اظہار کرتے ہوئے متاثرہ خاندانوں کے لیے 10 لاکھ بھارتی روپے کی امداد کا اعلان کیا ہے۔
واضح رہے کہ پہلا موقع نہیں ہے کہ فلم ایونٹ کے دوران مداح حادثے کا شکار ہوئے ہوں۔ اس سے قبل جنوبی بھارتی سپر اسٹار الو ارجن کی فلم ’پشپا 2‘ کے پریمیئر کے موقع پر بھگدڑ میں ایک خاتون مداح ہلاک ہوگئی تھیں جس کی وجہ سے الو ارجن کو پولیس نے گرفتار بھی کرلیا تھا۔
