اسلام آ باد:
پاک فضائیہ اور چین کی فضائیہ کے درمیان منعقدہ دو طرفہ مشق انڈس شیلڈ 2024ء کا چینی ماڈیول پاکستان ایئرفورس کے ایک آپریشنل ایئربیس پر مکمل ہوگیا، مشق میں چین کی پیپلز لبریشن آرمی ایئر فورس نے اپنے اہل کاروں اور جدید ٹیکنالوجی کے حامل آلات کے ساتھ حصہ لیا۔
آئی ایس پی آر کے مطابق مشق میں اے ای ایس اے ریڈار اور طویل فاصلے تک مار کرنے والے بی وی آر سے لیس جے-16 اور جے-10 سی لڑاکا طیارے، مہلک HQ-22 فضائی دفاعی نظام، طاقتور YTG-9 فضائی الیکٹرانک جنگی پلیٹ فارم اور KJ-500 ایئربورن ارلی وارننگ سسٹم شامل تھے۔
اس دوران پاکستانی فضائیہ کے جے-10 سی اور جے ایف-17 بلاک-III لڑاکا طیاروں کے ساتھ جدید فضائی جنگی مظاہرہ کیا گیا۔ ایسی بڑی مشق کی کامیاب تکمیل پاکستان فضائیہ کی اتحادی ممالک کے ساتھ مشترکہ آپریشنل تیاری کا عکاس ہے اور موجودہ سیکیورٹی چیلنجز سے نمٹنے کی صلاحیت کو ظاہر کرتی ہے۔
انڈس شیلڈ-چائنیز کا مقصد فضائی جنگی چیلنجز کا سامنا کرتے ہوئے چین اور پاکستان کے درمیان انٹرآپریبلٹی کو جانچنا اور حقیقی جنگی ماحول میں مختلف عسکری حکمت عملی کو آزمانا تھا۔ اس مشق نے دونوں فضائی افواج کی جنگی صلاحیت کو مزید مضبوط کیا ہے۔
