نامور اداکارہ اپاسنا سنگھ، جو “جڑواں” اور “میں پریم کی دیوانی ہوں” جیسی فلموں اور “کپل شرما شو” میں اپنی اداکاری کے لیے مشہور ہیں، نے حال ہی میں اپنے ابتدائی کیریئر کے ایک خوفناک تجربے کا انکشاف کیا۔
انہوں نے بتایا کہ ایک جنوبی بھارتی فلم ڈائریکٹر کے رویے نے ان کی زندگی اور کیریئر پر گہرا اثر چھوڑا۔
اپاسنا نے بتایا کہ ایک جنوبی ہدایتکار، جن کے ساتھ وہ انیل کپور کے ساتھ ایک فلم میں کام کر رہی تھیں، نے انہیں رات 11:30 بجے ایک ہوٹل میں ملاقات کے لیے بلایا۔
جب اپاسنا نے یہ درخواست ٹالنے کی کوشش کی تو ہدایتکار نے طنزیہ انداز میں کہا، “تمہیں بیٹھک کا مطلب نہیں پتا؟”
یہ جملہ ان کے لیے شدید پریشان کن تھا۔ اگلے دن، اپاسنا نے ہدایتکار کے دفتر جا کر سب کے سامنے ان کی سخت سرزنش کی۔ انہوں نے پنجابی میں غصے سے بھرپور الفاظ ادا کیے اور ان کے رویے پر سخت احتجاج کیا۔
اپاسنا نے اس واقعے کے بعد ایک ہفتے تک خود کو کمرے میں بند رکھا اور مسلسل روتی رہیں۔ انہیں یہ خوف تھا کہ یہ واقعہ ان کے کیریئر کو نقصان پہنچا سکتا ہے۔ لیکن اپنی والدہ کی قربانیوں کو یاد کرتے ہوئے، انہوں نے اپنی زندگی میں آگے بڑھنے کا عزم کیا۔
انہوں نے کہا، “میری ماں نے میرے خوابوں کو حقیقت بنانے کے لیے محنت کی۔ یہ سوچ کر میں نے خود کو سنبھالا اور آگے بڑھنے کا فیصلہ کیا۔”
