ممبئی میں مشہور پروگرام ’’کرائم پٹرول‘‘ کے اداکار راگھو تیواری پر جان لیوا حملہ کیا گیا ہے۔
اداکار کے مطابق ممبئی کی ایک سڑک پر چاقو سے لیس حملہ آور نے ان پر وار کیے جبکہ لوہے کی راڈ سے بھی مارا گیا۔ راگھو نے کہا کہ ’’ملزم ایک پیشہ ور چاقو حملہ آور‘‘ لگ رہا تھا۔
بھارتی میڈیا کے مطابق کرائم پٹرول میں اپنے کردار سے مشہور ہونے والے اداکار راگھو تیواری ممبئی میں سڑک عبور کرتے ہوئے کسی بائیکر سے ٹکرا گئے تھے، جس نے ان پر چاقو سے وار کردیا۔
اداکار کا کہنا ہے کہ وہ اپنے دوست کی گاڑی سے اتر کر سڑک عبور کررہے تھے جب وہ ملزم بائیکر سے ٹکرا گئے، جس پر انھوں نے ملزم سے معذرت بھی کی لیکن ملزم نے انھیں گالیاں دینی شروع کردیں اور بعد ازاں موٹر سائیکل سے اتر کر مجھ پر حملہ کردیا۔
راگھو نے بتایا کہ حملہ آور نے لوہے کی راڈ سے بھی مارا اور زخمی حالت میں چھوڑ کر موقع سے فرار ہوگیا۔
اداکار نے پولیس پر بھی الزام لگایا کہ حملہ آور کے خلاف مقدمہ درج کرانے کےلیے تھانے گئے لیکن پولیس نے ایک نہیں سنی۔ انہوں نے کہا کہ ’’پولیس نے سی سی ٹی وی فوٹیج اکٹھی کی، لیکن اس کے باوجود انہوں نے کوئی گرفتاری نہیں کی۔‘‘
اداکار نے دعویٰ کیا ہے کہ ملزم کی شناخت محمد زید کے نام سے ہوئی ہے جو مبینہ طور پر ڈائریکٹر پرویز شیخ کا بیٹا ہے۔
