پاک بھارت مقابلہ، میدان کا ترقیاتی کام جاری

کراچی: ٹی20 ورلڈکپ میں پاک بھارت مقابلے کے میدان کا ترقیاتی کام جاری ہے جب کہ نیویارک کے نساؤ کاؤنٹی اسٹیڈیم کی ڈراپ ان پچ فلوریڈا میں تیار کی جانے لگی۔

رواں برس جون میں ٹی 20 ورلڈکپ ویسٹ انڈیز اور امریکا میں مشترکہ طور پر کھیلا جائے گا، امریکا مجموعی طور پر 16 میچز کی میزبانی فلوریڈا، ٹیکساس اور نیویارک میں کرے گا۔

نساؤ کاؤنٹی اسٹیڈیم نیویارک خاص طور پر برصغیر کے کروڑوں کرکٹ شائقین کی دلچسپی کا باعث بنا ہوا ہے، وہاں پر پاکستان اور بھارت کے درمیان ہائی وولٹیج میچ 9 جون کو کھیلا جائے گا مگر وینیو پر بدستور تعمیراتی کام جاری ہے، وہاں پر ہزاروں تماشائیوں کی گنجائش کیلیے عارضی اسٹرکچر قائم کیا جارہا ہے، اس میں ڈراپ ان پچز نصب کی جائیں گی جو فلوریڈا میں تیار کی جارہی ہیں، یہ پچز آسٹریلیا کے ایڈیلیڈ اوول کے چیف کیوریٹر ڈیمن ہوف کی نگرانی میں تیار ہوئی ہیں، ان پر گھاس اگائی جارہی ہے۔

یہ بھی پڑھیں: ٹی20 ورلڈکپ؛ پاک بھارت میچ ’ڈراپ ان‘ پچ پر ہوگا

آئی سی سی مینز ٹی 20 ورلڈکپ امریکا کے چیف ایگزیکٹیو بریٹ جونز نے کہا کہ نساؤ کاؤنٹی انٹرنیشنل کرکٹ اسٹیڈیم میں ویسی ہی ڈراپ ان پچ نصب کی جائے گی جیسی اس وقت دنیا کے معروف اسٹیڈیمز میں موجود ہیں، ہماری خوش قسمتی ہے کہ یہ پچ ڈیمن ہوف نے تیار کی اور یہ ایڈیلیڈ اوول کے جیسی ہی ہوگی۔

یاد رہے کہ ایڈیلیڈ کی پچ پر گھاس موجود ہے،وہ شروع میں بولرز مگر کھیل آگے بڑھنے پر بیٹرز کیلیے جنت بن جاتی ہے۔

حال ہی میں سوشل میڈیا پر نساؤ کاؤنٹی اسٹیڈیم میں کیچڑ اور برف کی تصاویر بھی سوشل میڈیا پر زیرگردش رہیں، اس بارے میں جونز نے کہا کہ فروری کے آخر میں برف باری کی وجہ سے یہ جگہ ڈھک گئی تھی مگر اب صورتحال کافی بہتر ہے، اگرچہ ہمیں اب بھی بارشوں اور ٹھنڈے موسم کا سامنا ہے مگر ہم اسٹیڈیم کے ایونٹ کے آغاز سے کافی پہلے مکمل ہونے کیلیے پرامید ہیں، اپریل کے آخر تک فلوریڈا سے ڈراپ ان پچ نساؤ کاؤنٹی اسٹیڈیم پہنچ جائے گی، جس کی تنصیب کا کام بھی بروقت مکمل ہو گا۔