[ad_1]
وزیراعلیٰ پنجاب مریم نواز نے ایرانی صدر کا استقبال کیا (فوٹو: اسکرین گریب)
لاہور: ایرانی صدر ابراہیم رئیسی لاہور پہنچ گئے، جہاں وہ مزار اقبال پر حاضری دیں گے۔
وزیراعلیٰ پنجاب مریم نواز شریف نے علامہ اقبال انٹرنیشنل ائرپورٹ پر مہمان ایرانی صدر ابراہیم رئیسی کا استقبال کیا اور انہیں خوش آمدید کہا۔
مہمان وفد کی آمد کے موقع پر سینئر صوبائی وزیر مریم اورنگزیب، سینیٹر پرویز رشید، صوبائی وزیر اطلاعات عظمیٰ زاہد بخاری، وزیر خزانہ مجتبیٰ شجاع الرحمٰن، صوبائی وزیر سیکنڈری ہیلتھ کیئر اینڈ میڈیکل ایجوکیشن خواجہ سلیمان رفیق، صوبائی وزیر خوراک بلال یاسین، صوبائی وزیر انڈسٹریز چوہدری شافع حسین، چیف سیکرٹری، انسپکٹر جنرل پولیس، لاہور میں تعینات ایرانی قونصل جنرل مہران مواحدفر اور دیگر اس موقع پر موجود تھے۔
ایرانی صدر آج دورۂ لاہور کے دوران شاعر مشرق علامہ محمد اقبال کے مزار پر حاضری دیں گے۔ اس کے علاوہ ان کی وزیراعلیٰ پنجاب اور دیگر حکام سے ملاقاتیں طے ہیں، جس کے بعد وہ نصف دن لاہور میں گزار کر شہر قائد کراچی کے لیے روانہ ہوں گے، جہاں گزشتہ شب سے سکیورٹی انتظامات اور ٹریفک پلان کے تحت تیاریاں مکمل کی جا چکی ہیں۔
ایرانی صدر کراچی میں وزیراعلیٰ سندھ سید مراد علی شاہ، گورنر سندھ کامران ٹیسوری اور دیگر حکام سے ملاقاتیں کرنے کے بعد کل واپس روانہ ہو جائیں گے۔ اعلیٰ سطح کے ایرانی وفد کی لاہور اور کراچی آمد کے موقع پر دونوں شہروں میں آج تعطیل کا اعلان کیا گیا ہے اور سرکاری و نجی اداروں سمیت اسکول، کالجز اور یونیورسٹیوں میں بھی چھٹی کی گئی ہے۔
یاد رہے کہ ایرانی صدر ابراہیم رئیسی 3 روزہ سرکاری دورے پر پاکستان میں موجود ہیں۔ گزشتہ روز انہوں نے وفاقی دارالحکومت اسلام آباد میں وزیراعظم ہاؤس میں گارڈ آف آنر کا معائنہ کرنے کے بعد وزیراعظم شہباز شریف سے ملاقات کی تھی، جس کے بعد دونوں ممالک کے مابین تجارت ے فروغ، دہشت گردی کے خلاف مشترکہ اقدامات اور تعلقات کو مستحکم کرنے کے لیے کئی یادداشتوں پر دستخط کیے گئے تھے۔
بعد ازاں ایرانی صدر کے اعزاز میں صدر مملکت آصف علی زرداری کی جانب سے تقریب کا اہتمام تھا، جس میں دونوں رہنماؤں نے ملاقات میں پاک ایران تعلقات کو مزید مستحکم بنانے پر اتفاق کیا۔
[ad_2]
Source link
