سیالکوٹ، بارات میں دلہا کے دوستوں نے ایک کروڑ روپے نچھاور کردیے

سیالکوٹ: پنجاب کے علاقے سیالکوٹ میں شادی کے موقع پر تقریبا ایک کروڑ روپے کی پاکستانی و غیر ملکی کرنسی، موبائل فون نچھاور کیے گئے، جس پر پولیس نے دلہا اور باراتیوں کے خلاف مقدمہ درج کرلیا۔

تفصیلات کے مطابق سیالکوٹ کے علاقے تھانہ صدر میں شہری کی شادی کے دوران اُس کے بھائیوں، دوستوں اور رشتے داروں نے نوٹ نچھاور کیے۔ بارات میں صرف پاکستانی کرنسی نہیں بلکہ غیر ملکی کرنسی بھی لٹائی گئی۔

دلہا کو بارات میں غیر ملکی کرنسی کا ہار پہنایا گیا اور جب بارار مقامی شادی ہال پہنچی تو منتظمین نے لاکھوں روپے نچھاور کیے، جس کی وجہ سے دو گھنٹے تک ٹریفک جام رہا اور شہریوں کو مشکلات کا سامنا کرنا پڑا۔

بارات میں شامل نوجوانوں نے ہوائی فائرنگ بھی کی جس پر ڈی پی او نے نوٹس لیتے ہوئے دلہا اور بارات غیر قانونی اقدامات کرنے والوں کے خلاف مقدمہ درج کرلیا جبکہ ملزمان کی گرفتاری کے لیے پولیس نے چھاپے بھی مارے ہیں تاہم کسی بھی ملزم کی گرفتاری عمل میں نہیں آسکی۔