میں کینسر سے خوفزدہ نہیں ہوں، بھارتی اداکارہ حنا خان

 ممبئی: بھارتی ٹیلی وژن انڈسٹری کی معروف اداکارہ حنا خان نے کینسر کے مریضوں کی ہمت بڑھانے کے لیے پیغام جاری کردیا۔

چھاتی کے کینسر کا شکار ہونے والی اداکارہ حنا خان نے اپنے آفیشل انسٹاگرام ہینڈل کی اسٹوری میں جاری کیے گئے پیغام میں کہا کہ میں اپنے اس سفر کے دوران، ان تمام بہادر خواتین اور مردوں کی تعریف کرنا چاہتی ہوں جو میری طرح اس مشکل جنگ سے لڑ رہے ہیں۔

حنا خان نے کہا کہ میری خواہش ہے کہ میرا سفر ہمت اور حوصلہ افزا ہو تاکہ مجھے دیکھ کر مایوس لوگوں کو ہمت مل سکے اور وہ بھی جیت کے لیے پُرعزم ہوسکیں۔

اداکارہ نے تمام مریضوں سے مخاطب ہوتے ہوئے مزید کہا کہ یاد رکھیں کہ ہم تکلیف میں مبتلا ہوسکتے ہیں لیکن ہمیں خوفزدہ نہیں ہونا چاہیے۔

واضح رہے کہ بھارتی میڈیا کے مطابق گزشتہ کچھ دنوں سے سوشل میڈیا پر یہ افواہیں سامنے آرہی تھیں کہ اداکارہ حنا خان کینسر کا شکار ہوگئی ہیں جس پر اُن کے مداح تشویش میں مبتلا ہوگئے تھے۔

مزید پڑھیں: بھارتی اداکارہ حنا خان میں کینسر کی تشخیص

مداحوں چاہ رہے تھے کہ حنا خان خود منظرِ عام پر آکر اس خبر کی تصدیق یا تردید کریں، تاہم اداکارہ نے 28 جون کو اپنی انسٹاگرام پوسٹ میں خبر کی تصدیق کرتے ہوئے بتایا کہ وہ چھاتی کے کینسر کا شکار ہوگئی ہیں۔

حنا خان کا کہنا تھا کہ اُن کا علاج شروع ہوگیا ہے اور وہ سب کو یقین دلانا چاہتی ہیں کہ وہ اپنی فیملی کی سپورٹ، ہمت اور اللہ تعالیٰ کے فضل سے اس موذی مرض پر قابو پالیں گی۔