تحریک انصاف کے کارکنان کا پشاور میں احتجاج، ریڈ زون کی جانب مارچ

 پشاور: پاکستان تحریک انصاف کے کارکنان نے خیبر روڈ کو بند کرکے ریڈ زون کی طرف مارچ کیا۔

مشتعل کارکنان کی جانب سے وفاقی حکومت کے خلاف شدید نعرے بازی کی گئی۔ احتجاج کے پیش نظر ریڈ زون کو مکمل بند کر دیا گیا۔ اس موقع پر اسمبلی چوک میں پولیس کی بھاری نفری تعینات رہی۔

پی ٹی آئی رہنما شاندانہ گلزار نے اظہار خیال کرتے ہوئے کہا کہ ہمارا یہ علامتی احتجاج ہے، بانی پی ٹی آئی صرف ہماری بقاء اور سلامتی کی علامت ہیں جن کی گرفتاری پر عوام شدید غم و غصہ کا اظہار کر رہے ہیں، بانی پی ٹی آئی کو غلط طریقے سے بند کیا گیا یہ ہم بالکل برداشت نہیں کر سکتے۔

انہوں نے کہا کہ جو باتیں ہم آج کر رہے ہیں کچھ دن پہلے منظور پشتین نے جرگے میں کیں، پاکستان میں بنگلادیش والے حالات نہ بنائے جائیں، یہ پشتون جرگہ ہم اسلام آباد تک لیکر جائیں گے، نورین نیازی صاحبہ کو ہم ساتھ لیکر جائیں گے اور بانی پی ٹی آئی سے ملائیں گے۔