پی این ایس معاون کا کینیا کا خیرسگالی کا دورہ، میڈیکل کیمپ کا انعقاد

پاک بحریہ کےبحری جہازپی این ایس معاون کا کینیا کا خیرسگالی کا دورہ، میڈیکل کیمپ کا انعقاد کیا۔

ترجمان پاک بحریہ کے مطابق پاک بحریہ کا جہاز پی این ایس معاون انسانی ہمدردی کےمشن کی تکمیل کے سلسلے میں افریقہ کےدورے پر ہے،اسی سلسلے میں پی این ایس معاون نے کینیا کا خیرسگالی کا دورہ کیا۔

پاک بحریہ کی جانب سے میڈیکل کیمپ  بھی لگایا گیا جہاں کینیا کی عوام کو مفت علاج، آپریشنز اور مفت ادویات فراہم کی گئیں، کینیا کی عوام نے پاک بحریہ کی جانب سے میڈیکل کیمپ کے انعقاد کو بڑے پیمانے پر سراہا اور پاکستان کو خراجِ تحسین پیش کیا۔

قبل ازیں ممباسا بندرگاہ پہنچنے پرکینیا کےاعلی سول وعسکری اورپاکستانی سفارتی حکام نے پاک بحریہ کے جہازکا پُرتپاک استقبال کیا،اس موقع پر کمانڈنگ آفیسرنے کینیا کے اعلی سول و عسکری حکام سے اہم ملاقاتوں کے دوران باہمی دلچسپی کے اموراوردوطرفہ بحری تعاون پر تبادلہ خیال کیا۔

 کمانڈنگ آفیسرنے چیف آف دی نیول اسٹاف ایڈمرل نوید اشرف کی جانب سے کینیا کی عوام اور بحریہ کیلیے خیرسگالی کا پیغام بھی پہنچایا، دورے کا مقصد انسانی ہمدردی کے جذبے کا فروغ، دوطرفہ بحری تعاون کا مزید استحکام اور پاکستان کے مثبت تاثر کا فروغ ہے۔