تجزیہ کار شہباز رانا کا کہنا ہے کہ حکومت کے معاشی بحالی کے پانچ سالہ منصوبے اڑان پاکستان کے وعدے ہیں، لانگ پلانز ہیں، ٹارگٹس ہیں جو اچھی بات ہے، آپ کسی اونچے ہدف کو حاصل کرنے کی کوشش کرو گے تو شاید اسے حاصل نہ کر سکو مگر اس کے قریب قریب پہنچ جاؤ گے۔
ایکسپریس نیوز کے پروگرام دی ریویو میں گفتگو کرتے ہوئے انھوں نے کہا کہ کچھ ہفتے پہلے وزیرخزانہ اور بعض اہم لوگوں نے کراچی اور لاہور میں تاجر برادری سے ملاقاتیںکی تھیں، جن میں تاجر برادری نے حکومت سے اکانومی کو کھولنے کا مطالبہ کیا تھا، پہلی سہ ماہی کے اعدادوشمار حکومت کی توقعات سے بہت نیچے ہیں، جولائی، اگست اور ستمبر کی پہلی سہ ماہی میں ترقی کی شرح محض0.92 فیصدہے جو گزشتہ سال کی 2.3 فیصد نمو کے مقابلے میں کم ہے۔
اس کی اہم وجہ صنعت و زراعت کی کم پیداوار ہے، اہم فصلوں کی پیداوار میں 11.2فیصد کمی ہوئی ہے، چاول، کپاس، گنا، اور مکئی کی پیداوار متاثر ہوئی ہے، صنعتی شعبے میں ایک فیصد سکڑاؤہے، کرنٹ اکاؤنٹ خسارہ تقریباً ختم ہو گیا ہے، لیکن یہ مینجڈ ہے، ششماہی ٹیکس ہدف حاصل نہیں کیا جاسکتا۔
تجزیہ کار کامران یوسف نے کہا کہ سیکیورٹی کے اعتبار سے2024 بڑا مشکل سال رہا، گزشتہ سال 2014 کے بعد دہشت گردی کے سب سے زیادہ 444واقعات ریکارڈ ہوئے، ان کا زیادہ تر فوکس بلوچستان اور خیبر پختونخوا رہا، پاکستان کا یہ ماننا ہے کہ اس کی وجہ سرحد پار افغانستان میں دہشتگردی کے وہ ٹھکانے ہیں جس کی وجہ سے ہمیں مسئلہ پیش آ رہا ہے۔
