عدت میں نکاح کیس؛ بشریٰ بی بی نے سزا معطلی کی درخواست دائر کردی

 اسلام آباد: دورانِ عدت نکاح کیس میں بشریٰ بی بی کی جانب سے سزا معطلی کی درخواست دائر کردی گئی ہے۔

ایکسپریس نیوز کے مطابق بانی چیئرمین پی ٹی آئی عمران خان کی اہلیہ بشریٰ بی بی نے اسلام آباد ہائی کورٹ میں دورانِ عدت نکاح کیس میں سزا معطلی کی درخواست دائر کردی۔ بیرسٹر سلمان صفدر کے توسط سے دائر درخواست میں استدعا کی گئی ہے کہ سزا معطل کرکے ضمانت پر رہائی دی جائے۔

یہ خبر بھی پڑھیں: دورانِ عدت نکاح کیس کی نئی عدالت میں سماعت، فریقین کو نوٹسز جاری

درخواست میں اسلام آباد ہائی کورٹ سے استدعا کی گئی ہے کہ عدالت 3 فروری کی سزا کا فیصلہ معطل کرکے ضمانت پر رہائی کے احکامات جاری کرے۔ استغاثہ نے تضاد سے بھرپور کمزور شواہد عدالت میں پیش کیا۔ ان شواہد کی بنیاد پر سزا نہیں سنائی جاسکتی تھی۔ ٹرائل کورٹ کی جانب سے دی گئی سزا برقرار نہیں رہ سکتی۔

واضح رہے کہ سول کورٹ نے 3 فروری کو سابق خاتون اول بشریٰ بی بی کو 7 سال قید کی سزا سنائی تھی۔