پاکستان میں معاشی استحکام کی صورتحال بہتر ہو رہی ہے، آئی ایم ایف

  اسلام آباد: انٹرنیشنل مانیٹری فنڈ ( آئی ایم ایف) نے کہا ہے کہ پاکستان میں معاشی استحکام کی صورتحال میں بتدریج بہتری آ رہی ہے۔

آئی ایم ایف کی نمائندہ برائے پاکستان ایسٹر پیریز روئز نے پالیسی ادارہ برائے پائیدار ترقی میں پاکستان میں زندگی کے معیار کو بہتر کرنے اور اقتصادی استحکام پرمکالمے میں کہا کہ پاکستان میں 2023 سے معاشی حالات میں استحکام کے لیے کی جانے والی کوششیں قابل ستائش ہیں۔ پاکستان میں معاشی استحکام کی صورتحال بتدریج بہتر ہو رہی ہے۔

نمائندہ آئی ایم ایف کا مزید کہنا تھا کہ مائیکرو اور میکرو اقتصادی استحکام کا توازن برقرار رکھنا ایک چیلنج ہے۔ حالیہ اقتصادی استحکام کی پاکستان میں بڑی اہمیت ہے اسے کم نہ سمجھا جائے۔ سال 2023 کے اسٹینڈ بائی ارینجمنٹ نے آئی ایم ایف کی حمایت اور اقتصادی استحکام کے عزم کو مضبوط کیا۔ پلیسی سازی پر اعتماد میں بہتری، معاشی ترقی کی بحالی، اور افراط زر میں نمایاں کمی دیکھنے میں آ رہی ہے۔

انہوں نے مزید کہا کہ 2023 میں ذخائر میں بہتری اور اسٹیٹ بینک آف پاکستان کی پالیسی ریٹ میں کمی کا مثبت اثرہوا ہے اور 2024 کے ای ایف ایف پر کامیاب عملدرآمد کے لیے مضبوط پالیسیوں کی ضرورت ہے۔