شہر کے مختلف علاقوں میں فائرنگ کے واقعات میں نوجوان لڑکی سمیت 2 افراد زخمی ہوگئے۔
تفصیلات کے مطابق کورنگی کے علاقے 5 نمبر میمن انسٹیٹوٹ کے قریب فائرنگ کے پراسرار واقعہ میں نوجوان لڑکی زخمی ہوگئی جسے فوری طبی امداد کے لیے جناح اسپتال لیجایا گیا۔
ریسکیو حکام کے مطابق مضروبہ کی شناخت 25 فاطمہ کے نام سے کی گئی جسے ٹانگ پر گولی لگی تھی جبکہ واقعہ نامعلوم سمت سے آنے والی گولی لگنے کا بتایا جا رہا ہے۔
تاہم، پولیس مزید معلومات حاصل کر رہی ہے۔
دریں اثنا بلوچ کالونی نجی یونیورسٹی کے قریب فائرنگ کے واقعہ میں نوجوان زخمی ہوگیا اس حوالے سے بلوچ کالونی پولیس کا کہنا ہے کہ مضروب کی شناخت 25 سالہ ایان کے نام سے کی گئی جبکہ ابتدائی تحقیقات میں واقعہ جھگڑے کے دوران پیش آنے کا بتایا جا رہا ہے جس کی پولیس مزید تحقیقات کر رہی ہے۔
