اللہ کے مہمانوں کی خدمت؛ گرمی میں کمی کیلیے سڑکوں پر سفید رنگ کردیا گیا

ریاض: سعودی حکومت نے حج انتظامات کو حتمی شکل دے رہی ہے اور اس برس حاجیوں کو شدت گرمی سے محفوظ رکھنے کے لیے شیلٹرز کے علاوہ سڑکوں پر سفید رنگ کا پینٹ بھی کیا جا رہا ہے۔ 

سعودی میڈیا کے مطابق عرفات میں جھلسا دینے والی دھوپ کو جذب کرنے والا سفید رنگ مسجد نمرہ کی اطراف کی سڑکوں پر کیا جا رہا ہے۔ جس سے تپش کی تمازت کم ہوگی اور عازمین حج تپتی دھوپ میں پیدل آسانی سے چل سکیں گے۔

یہ منصوبہ سعودی عرب کی روڈز جنرل اتھارٹی نے تیار کیا تھا۔ اس سفید رنگ کے خصوصی پینٹ سے درجہ حرارت میں 20 ڈگری سیلسیس کمی واقع ہونے کا امکان ہے۔

روڈز جنرل اتھارٹی کے ترجمان نے بتایا کہ اس پینٹ کو خصوصی طور پر اُن کیمیکل سے تیار کیا گیا ہے جن میں سورج کی شعاعوں کو جذب کرنے کی صلاحیت ہوتی ہے۔

بیان میں کہا گیا ہے کہ مسجد نمرہ کے آس پاس 25 ہزار مربع میٹر پر محیط سڑکوں پر پینٹ کیا گیا ہے۔ یہ وہ راستے ہیں جہاں سے حاجی میدان عرفات کی جانب سے جائیں گے۔

یاد رہے کہ گزشتہ برس سفید رنگ کے اس پینٹ کی سڑکوں پر پیدل چلنے کے نشانات ’’زیبر کراسنگ‘‘ پر تجرباتی بنیاد پر کیے گئے تھے جس کے شاندار نتائج نکلے تھے اور درجہ حرارت میں 15 ڈگری تک کمی ہوئی تھی۔