پانسہ پلٹنے والی ریاستیں شمالی کیرولینا، ایریزونا اور جارجیا میں ٹرمپ کو حیران کن سبقت حاصل ہے، نیویارک ٹائمز سروے
واشنگٹن: صدارتی انتخاب میں پانسہ پلٹ دینے والی 3 ریاستوں کے سروے میں ریپبلکن پارٹی کے امیدوار ڈونلڈ ٹرمپ کو حکمراں جماعت ڈیموکریٹ کی امیدوار کملا ہیرس پر سبقت حاصل ہوگئی۔
امریکی صدارتی الیکشن 5 نومبر کو ہوں گے لیکن اس سے قبل ہونے والوں میں سروے میں ووٹرز کا ملا جلا رجحان سامنے آ رہا ہے جس میں اب تک کملا ہیرس کو فیوریٹ قرار دیا جا رہا ہے۔
تاہم نیو یارک ٹائمز اور سیانا کالج کے تین اہم میدان جنگ جو پانسہ پلٹ سکتے ہیں، میں کیے گئے نئے سروے میں سابق صدر ڈونلڈ ٹرمپ کے لیے خوش خبری ہے۔
نیویارک ٹائمز کے اس پول میں ایریزونا میں 713 ووٹرز، جارجیا میں 682 ووٹرز اور شمالی کیرولینا میں 682 ووٹرز نے حصہ لیا تھا اور ہر ریاست میں چار سے پانچ فیصد پوائنٹس کے درمیان غلطی کا مارجن ہوتا ہے۔
سروے کے مطابق ایریزونا، شمالی کیرولینا اور جارجیا میں ڈونلڈ ٹرمپ کا پلڑا حیران کن طور پر بھاری ہے۔
تینوں ریاستوں کے ووٹرز نے معیشت، اسقاط حمل، امیگریشن اور مجموعی طور پر ملک کی سمت کے بارے میں تشویش کا اظہار کیا اور مجموعی طور پر ایک سے دو فیصد کے مارجن سے ڈونلڈ ٹرمپ کو ترجیح دی۔
ایری زونا میں کملا ہیرس کی مقبولیت 45 فیصد جب کہ ٹرمپ کو یہاں 50 فیصد ووٹرز کی حمایت رہی۔ جارجیا میں بھی ٹرمپ نے 49 فیصد اور کملا ہیرس کے حصے میں 45 فیصد آئے۔
شمالی کیرولینا کا منظرنامہ بھی ٹرمپ کے حق میں ہے۔ جہاں سابق صدر پر 49 فیصد جب کہ کملا ہیرس پر 47 فیصد ووٹرز نے اعتماد کا اظہار کیا۔
ان ریاستوں میں شمالی کیرولینا نے 2008 سے ڈیموکریٹ کے کسی بھی صدارتی امیدوار کو کامیاب نہیں کرایا البتہ ایریزونا اور جارجیا نے گزشتہ الیکشن میں جوبائیڈن کے حق میں فیصلہ دیا تھا۔
